'ਅਵਤਾਰ ਸਿੰਘ ਮਿਸ਼ਨਰੀ ਜੀ ਤੋਂ ਕੁੱਝ ਸਵਾਲ'

ਹਰਦੇਵ ਸਿੰਘ,ਜੰਮੂ 

ਅਵਤਾਰ ਸਿੰਘ ਮਿਸ਼ਨਰੀ ਜੀਉ,

ਗੁਰੂ ਜੀ ਦੀ ਬਖ਼ਸ਼ੀ ਫ਼ਤਿਹ ਪਰਵਾਨ ਕਰਨੀ ਜੀ !

ਪਿਛਲੇ ਚਾਰ ਕੁ ਸਾਲਾਂ ਤੋਂ ਮੈਂ ਕੁੱਝ ਸਵਾਲ ਕੁੱਝ ਸੱਜਣਾਂ ਨੂੰ ਪੁੱਛਦਾ ਆਇਆ ਹਾਂ ਪਰ ਜਵਾਬ ਨਹੀਂ ਮਿਲਿਆ। ਚੰਦ ਕੁ ਸੱਜਣ ਤਾਂ ਐਸੇ ਵੀ ਸਨ ਜਿਨ੍ਹਾਂ ਸਿੱਖ ਪੰਥ ਨੂੰ ਸਿੱਖੀ ਸਿਖਾਆਉਂਣ ਲਈ ਨਿਯਮ ਵੀ ਫ਼ਿਕਸ ਕਰ ਦਿੱਤੇ। ਉਹ ਮੇਰੇ ਨਾਲ ਲਿਖਤੀ ਚਰਚਾ ਕਰਦੇ ਰਹੇ ਪਰ ਕੁੱਝ ਸਿੱਧੇ ਜਿਹੇ ਸਵਾਲਾਂ ਦਾ ਜਵਾਬ ਦੇਂਣ ਤੋਂ ਕੰਨੀ ਕਤਰਾਉਂਦੇ ਰਹੇ। ਕਾਰਣ ਇਹ ਸੀ ਕਿ ਜਵਾਬ ਦੇਂਣ ਵਿਚ ਉਨ੍ਹਾਂ ਵਲੋਂ ਗੁਰਮਤਿ ਦੀ ਸਮਝ ਬਾਰੇ ਕੀਤੇ ਜਾ ਰਹੇ ਦਾਵੇ ਖੋਖਲੇ ਸਾਬਤ ਹੁੰਦੇ ਸੀ ਅਤੇ ਉਹ ਆਪ ਆਪਣੇ ਖੜੇ ਕੀਤੇ ਭੰਭਲਭੂਸੇ ਵਿਚ ਫ਼ੱਸਦੇ ਸੀ।
 ਖ਼ੈਰ, ਚੁੰਕਿ ਆਪ ਵੀ ਗੁਰਮਤ ਦੇ ਪ੍ਰਚਾਰਕ ਹੋਂਣ ਦੀ ਗਲ ਕਰਦੇ ਹੋ ਇਸ ਲਈ ਮੈਂ ਉਹੀ ਸਵਾਲ ਆਪ ਜੀ ਤੋਂ ਪੁੱਛਣ ਦੀ ਹਿਮਾਕਤ ਕਰ ਰਿਹਾ ਹਾਂ, ਕਿਉਂਕਿ ਮੈਂ ਸਮਝਦਾ ਹਾਂ ਕਿ ਕਿਸੇ ਬਾ-ਕਾਯਦਾ ਪ੍ਰਚਾਰਕ ਨੂੰ ਇਸ ਗਲ ਦਾ ਗਿਆਨ ਹੋਂਣਾ ਚਾਹੀਦਾ ਹੈ, ਕਿ ਜੋ ਵਿਸ਼ਾ ਉਹ ਪ੍ਰਚਾਰਦਾ ਹੈ, ਉਸ ਵਿਸ਼ੇ ਬਾਰੇ ਉਸ ਦੀ ਆਪਣੀ ਪਕੜ ਕਿਤਨੀ ਕੁ ਮਜ਼ਬੂਤ ਹੈ ? ਆਸ ਹੈ ਕਿ ਹੇਠ ਲਿਖੇ ਮੇਰੇ ਸਵਾਲਾਂ ਨੂੰ ਆਪ ਜੀ ਇਸੇ ਪਰਿਪੇਖ ਵਿਚ ਸਮਝਦੇ ਹੋਏ ਇਸ ਵਿਸ਼ੇ ਬਾਰੇ ਆਪਣਾ ਗਿਆਨ ਸਾਂਝਾ ਕਰੋਗੇ:-

(੧) ਗੁਰੂ ਨਾਨਕ ਜੀ ਨੇ ਆਪਣੀ ਬਾਣੀ ਅੰਦਰ ਧਰਤੀ ਨੂੰ 'ਧਰਮ ਸਾਲ' ਕਿਹਾ ਹੈ।ਫਿਰ ਗੁਰੂ ਸਾਹਿਬਾਨ ਨੇ ਗੁਰਦੁਆਰਿਆਂ ਨੂੰ ਪਹਿਲਾਂ 'ਧਰਮ ਸਾਲ' ਦਾ ਨਾਮ ਕਿਉਂ ਦਿੱਤਾ ?
(੨) ਗੁਰਬਾਣੀ ਅਨੁਸਾਰ 'ਕਰਤਾਰ' ਪਰਮਾਤਮਾ ਨੂੰ ਕਿਹਾ ਗਿਆ ਹੈ ਜੋ ਕਿ ਇਕੋ ਹੈ। ਫਿਰ ਗੁਰੂ ਨਾਨਕ ਜੀ ਨੇ ਜ਼ਮੀਨ ਦੇ ਇਕ ਟੁੱਕੜੇ ਨੂੰ 'ਕਰਤਾਰਪੁਰ' ਦਾ ਨਾਮ ਕਿਉਂ ਦਿੱਤਾ ? ਗੁਰੂ ਅਰਜਨ ਦੇਵ ਜੀ ਨੇ ਵੀ  ਦੋਆਬ ਖੇਤਰ ਵਿਚ ਹੋਰ ਥਾਂ ਦਾ ਨਾਮ 'ਕਰਤਾਰਪੁਰ' ਕਿਉਂ ਰੱਖਿਆ ?
 (੩) ਗੁਰਬਾਣੀ ਅਨੁਸਾਰ 'ਤਰਨਤਾਰਨ' ਪਰਮਾਤਮਾ ਹੈ। ਫਿਰ ਗੁਰੂ ਸਾਹਿਬ ਜੀ ਨੇ ਇਕ ਸਥਾਨ ਦਾ ਨਾਮ 'ਤਰਨਤਾਰਨ' ਕਿਉਂ ਰੱਖਿਆ ?
(੪) ਗੁਰਬਾਣੀ ਅਨੁਸਾਰ 'ਆਨੰਦ' ਕੀ ਹੈ ਇਸ ਨੂੰ ਆਪ ਜੀ ਜਾਣਦੇ ਹੋ। ਫ਼ਿਰ ਗੁਰੂ ਸਾਹਿਬ ਨੇ ਇਕ ਸਥਾਨ ਨੂੰ 'ਆਨੰਦਪੁਰ' ਕਿਉਂ ਕਹਿਆ ? 

(੫) ਬਾਣੀ ਵਿਚ ਦਰਸਾਏ 'ਸੰਤੋਖ' ਨੂੰ ਅਸੀਂ ਜਾਣਦੇ ਹਾਂ।ਫਿਰ ਗੁਰੂ ਸਾਹਿਬ ਨੇ ਇਕ ਸਰੋਵਰ ਦਾ ਨਾਮ 'ਸੰਤੋਖਸਰ' ਕਿਉਂ ਰੱਖਿਆ ?
(੬) ਗੁਰਬਾਣੀ ਅੰਦਰ ਦਰਸਾਏ 'ਬਿਬੇਕ' ਦੇ ਭਾਵ ਨੂੰ ਅਸੀਂ ਜਾਣਦੇ ਹਾਂ।ਫਿਰ ਗੁਰੂ ਸਾਹਿਬ ਨੇ ਇਕ ਸਰੋਵਰ ਦਾ ਨਾਮ 'ਬਿਬੇਕਸਰ' ਕਿਉਂ ਰੱਖਿਆ ?
(੭) ਬਾਣੀ ਅੰਦਰ ਦਰਸਾਏ 'ਕੀਰਤ' ਦੇ ਸਿਧਾਂਤ ਨੂੰ ਅਸੀਂ ਜਾਣਦੇ ਹਾਂ।ਫਿਰ ਗੁਰੂ ਸਾਹਿਬ ਨੇ ਇਕ ਸਥਾਨ ਦਾ ਨਾਮ 'ਕੀਰਤਪੁਰ' ਕਿਉਂ ਰੱਖਿਆ ?
(੮) ਇਸ ਪ੍ਰਸ਼ਨ ਸ਼੍ਰੰਖਲਾ ਦਾ ਆਖਰੀ ਸਵਾਲ! ਜੇ ਕਰ 'ਅਵਤਾਰਵਾਦ' ਦੀ ਵਿਚਾਰਧਾਰਾ ਬ੍ਰਾਹਮਣੀ ਵਿਚਾਰ ਹੈ ਤਾਂ ਆਪ ਜੀ ਦੇ   ਆਪਣੇ ਨਾਮ ਵਿਚ ਇਸ ਦਾ ਪ੍ਰਭਾਵ ਕਿਉਂ ਹੈ ?

ਆਪ ਜੀ ਵਲੋਂ ਉੱਤਰ ਦੀ ਉਡੀਕ ਵਿਚ,
 ਹਰਦੇਵ ਸਿੰਘ,ਜੰਮੂ-੧੯.੦੫.੨੦੧੪

' ਮੀਣਿਆਂ ਦੇ ਗੁਰਗੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਕਸਵਟੀ ਤੇ '
ਹਰਦੇਵ ਸਿੰਘ-ਜੰਮੂ

ਪ੍ਰਚਾਰਕ, ਲੇਖਕ ਅਤੇ ਧਿਰ ਕਹਿੰਦੇ ਹਨ ਕਿ ਅਸੀਂ ਪ੍ਰਚਾਰ ਵਿਚ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਕਸਵਟੀ ਨੂੰ ਵਰਤਣਾ ਹੈ ! ਬਹੁਤ ਚੰਗਾ ਕਥਨ ਹੈ, ਪਰ ਜੇ ਕਰ ਇਹ, ਕਹਿਣ ਵਾਲਿਆਂ ਦੀ ਆਪਣੀ ਕਰਨੀ ਵਿਚ ਉਤਰ ਜਾਏ ਤਾਂ ! ਇਸ ਲਈ ਜ਼ਰੂਰੀ ਹੈ ਕਿ  ਸਿੱਖਾਂ ਨੂੰ ਕਸਵਟੀ ਤੇ ਪਰਖਦੇ ਰਹਿਣ ਵਾਲੇ ਅੱਜ ਦੇ ਪ੍ਰਚਾਰਕਾਂ ਅਤੇ ਲੇਖਕਾਂ ਨੂੰ ਵੀ ਪਹਿਲਾਂ  ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਇਕ  ਮੁੱਡਲੀ ਕਸਵਟੀ ਤੇ ਪਰਖਿਆ ਜਾਏ।

ਮੈਂ ਤਾਂ ਇਕ ਕਸਵਟੀ ਨੂੰ ਸਭ ਤੋਂ ਪਹਿਲਾਂ ਕਰਕੇ ਮੰਨਦਾ ਹਾਂ। ਉਹ ਕਸਵਟੀ ਹੈ ਗੁਰੂ ਗ੍ਰੰਥ ਜੀ ਦੀ ਗੁਰਤਾ ਪਦਵੀ ਅਤੇ ਪ੍ਰਮਾਣਿਕਤਾ ਬਾਰੇ ਕਿਸੇ ਪ੍ਰਚਾਰਕ, ਲੇਖਕ ਅਤੇ ਧਿਰ ਦੇ ਵਿਚਾਰ। ਜੇ ਕਰ ਕੋਈ ਪ੍ਰਚਾਰਕ ਲੇਖਕ ਜਾਂ ਧਿਰ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਅਤੇ ਉਸਦੀ ਬਾਣੀ ਦੀ ਪ੍ਰਮਾਣਿਕਤਾ ਬਾਰੇ ਕਿੰਤੂ ਕਰਦਾ ਜਾਂ ਕਿੰਤੂਆਂ ਵਿਚ ਆਪਣਾ ਯੋਗਦਾਨ ਪਾਉਂਦਾ ਹੈ ਤਾਂ ਉਸ ਪ੍ਰਚਾਰਕ ,ਲੇਖਕ ਜਾਂ ਧਿਰ ਵਿਚ ਇਸ ਪੱਖੋਂ ਭਾਰੀ ਖੌਟ ਹੈ, ਜੋ ਕਿ ਕਿਸੇ ਵੀ ਹੋਰ ਖੋਟ ਨਾਲੋਂ ਜ਼ਿਆਦਾ ਬੁਰਾ ਹੈ। ਕਿਸੇ ਵੱਲੋਂ ਅਗਿਆਨਤਾ ਵੱਸ ਗਲਤੀ ਹੋ ਸਕਦੀ ਹੈ, ਪਰ ਜੇ ਕਰ ਐਸਾ ਕਰਨ ਵਾਲੇ  ਸੱਜਣ ਐਸਾ ਕਰਨ ਤੋਂ ਨਹੀਂ ਹੱਟਦੇ ਤਾਂ ਉਹ, ਇਸ ਪੱਖੋਂ, ਮੀਣੇ ਜਾਂ 'ਮੀਣਿਆਂ ਦੇ ਗੁਰਗੇ' ਹਨ। ਭਾਈ ਗੁਰਦਾਸ ਜੀ ਦੀਆਂ ਵਾਰਾਂ ਵਿਚ ਮੀਣਿਆਂ ਬਾਰੇ ਵਿਸ਼ੇਸ਼ ਹਿਦਾਅਤਾਂ ਹਨ। ਤਾਂ ਹੀ ਕੁੱਝ ਗੁਰਗਿਆਂ ਨੂੰ ਭਾਈ ਗੁਰਦਾਸ ਦੀਆਂ ਵਾਰਾਂ ਦੇ ਵਿਰੌਧ ਵਿਚ ਵੀ ਖੜਾ ਕੀਤਾ ਗਿਆ ਹੈ। ਅੱਜ ਮੀਣਿਆਂ ਨੇ ਪੰਥ ਵਿਚ ਆਪਣੇ ਗੁਰਗੇ ਖੜੇ ਕਰਕੇ ਵਾਪਸੀ ਕੀਤੀ ਹੈ ! ਭਾਈ ਕਾਹਨ ਸਿੰਘ ਨਾਭਾ ਨੇ ਐਸੇ ਗੁਰਗਿਆਂ ਦੇ ਅਰਥ ਭੇੜੀਏ ਦੀ ਤਰਾਂ ਦਾਉ ਲਾਉਣ ਵਾਲੇ ਕੀਤੇ  ਹਨ !!

ਕੋਈ ਗ਼ੈਰ ਸਿੱਖ ਅੱਜ ਗੁਰੂ ਗ੍ਰੰਥ ਸਾਹਿਬ ਜੀ ਨੂੰ ਨਕਲੀ ਸਰੋਤ ਦਾ ਸਿੱਟਾ ਕਹੇ ਤਾਂ ਫ਼ਸਾਦ ਖੜਾ ਹੋ ਜਾਏ। ਪਰ ਜੇ ਕਰ ਸਿੱਖ ਅਖਵਾਉਂਦੇ ਪ੍ਰਚਾਰਕ ਅਤੇ ਲੇਖਕ ਮੀਣਿਆਂ ਦੇ ਗੁਰਗੇ ਬਣ ਐਸਾ ਕਰਨ ਲੱਗ ਜਾਣ ਤਾਂ ਗ਼ੈਰ ਸਿੱਖ ਨੂੰ ਸਾਹਮਣੇ ਆਉਂਣ ਦੀ ਲੋੜ ਹੀ ਕੀ ਹੈ ? ਉਹ ਕਿਉਂ ਆਪਣਾ ਸਮਾਂ ਬਰਬਾਦ ਕਰੇ ?

ਭਲਾ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਪ੍ਰਮਾਣਿਕਤਾ ਤੇ ਕਿੰਤੂ ਕਰਨ, ਜਾਂ ਜਾਣਬੂਝ ਕੇ ਕਿੰਤੂਆਂ ਵਿਚ ਸਹਿਯੇਗ ਪਾਉਂਣ ਵਾਲਾ ਪ੍ਰਚਾਰਕ/ਲੇਖਕ, ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਕਸਵਟੀ ਤੇ ਪੁਰਾ ਉਤਰ ਸਕਦਾ ਹੈ ? ਨਿਰਸੰਦੇਹ ਨਹੀਂ ! ਨਾਮ, ਚੋਧਰਾਹਟ,ਧੜੇਬਾਜ਼ੀ ਅਤੇ ਪੈਸੇ ਦੀ ਭੁੱਖ ਵਿਚ ਲਿੱਪਤ ਹੋ ਕੇ ਗੁਰੂ ਗ੍ਰੰਥ ਸਾਹਿਬ ਜੀ ਤੇ ਕਿੰਤੂ ਕਰਨਾ ਪੰਥ ਅਤੇ ਸਮੁੱਚੀ ਮਨੁੱਖਤਾ ਨਾਲ ਸਭ ਤੋਂ ਵੱਡਾ ਧ੍ਰੋਹ ਹੈ।

ਜਿਹੜੇ  ਸੱਜਣ ਕਦੇ ਅਗਿਆਨਤਾ ਵੱਸ ਮੀਣਿਆਂ ਦਾ ਪੱਖ ਪੁਰਦੇ ਰਹੇ ਜਾਂ ਪੁਰ ਰਹੇ ਹਨ, ਉਨਾਂ ਪਾਸ ਬੇਨਤੀ ਹੈ ਕਿ ਉਹ ਪਾਠਕਾਂ ਤੋਂ ਮਾਫ਼ੀ ਮੰਗ ਕੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਇਸ ਪਹਿਲੀ ਮੁੱਡਲੀ ਕਸਵਟੀ ਤੇ ਪੁਰਾ ਉਤਰਣ ਦੀ ਸੁਹਿਰਦਤਾ ਦਾ ਸਬੂਤ ਦੇਂਣ। ਨਹੀਂ ਤਾਂ ਇਤਹਾਸ ਉਨਾਂ ਨੂੰ ਕਦੇ ਮਾਫ਼ ਨਹੀਂ ਕਰੇਗਾ ਅਤੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਕਸਵਟੀ ਤੇ ਐਸੇ ਲੋਗ 'ਮੀਣਿਆਂ ਦੇ ਗੁਰਗੇ' ਕਰਕੇ ਜਾਣੇ ਜਾਣ ਗੇ !

ਨਾਮ, ਚੋਧਰਾਹਟ,ਧੜੇਬਾਜ਼ੀ ਅਤੇ ਪੈਸੇ ਦੀ ਭੁੱਖ ਵਿਚ ਲਿੱਪਤ ਹੋ ਕੇ ਗੁਰੂ ਗ੍ਰੰਥ ਸਾਹਿਬ ਜੀ ਤੇ ਕਿੰਤੂ ਕਰਨਾ ਪੰਥ ਅਤੇ ਸਮੁੱਚੀ ਮਨੁੱਖਤਾ ਨਾਲ ਸਭ ਤੋਂ ਵੱਡਾ ਧ੍ਰੋਹ ਹੈ।

ਹਰਦੇਵ ਸਿੰਘ,ਜੰਮੂ-੧੨.੦੫.੨੦੧੪